د بابوزي په قلم
د ملي ژغورني ورځ او د ملي تلويزيون پروګرامونه
په بشپړ باور ويلای سم چي زياتو ليدونکو به د ملي ټلويزيون د دلو د اوه ويشتمي شپې پروګرامونه ليدلي وي. د نوموړي شپې د پروګرامونو د ليدلو تکل به د بيلا بيلو موخو او هيلو پر بنسټ وو . يو شمير ليدونکوته به دا ورځ د هيواد د ژغورني د ورځی په توګه ارزښتمنه وه او د همدې ميني پر بنسټ به يې د هيواد د ملي تلويزيون د پروګرامونو د ليدلو لپاره زړه ښه کړی وي، يو شمير نورو به د هيواد د اوسنی واکمني ادارې د دريځ څرګندولو په نيت د دې ورځی پروګرامونه تعقيب کړي وي او يو شمير نور به دملي تلويزيون د پروګرامونه د معمولي او همېشني ليدونکو په توګه د همدې شپې پروګرامونه ليدلي وي . په هر صورت د ملي تلويزيون د دلو د مياشتي د ٢٦ تمي نېټې د پروګرامونو د ليدلو لپاره به د هيواد زياتو وګړو ليوالتيا درلوده .
د هيوادوالو په زړونو کي د ملي ژغورني د ورځي د مناسبي نمانځني هيلي هغه مهال په اوبو لاهو سوې چي په ملي تلويزيون کي د شپې پر نه بجو د مستند فلم په توګه د جنګسالارانواو پيژندل سويوداړه مارانودبدمعاشئ د هغه فلم خپريدل پيل سوه چي د هر افغان پر زخمي زړه د مالګي شندل وه . ما او زما سره په ديره کي ناستو کسانو دا فلم ته کتل او په خپلو کي مو ويل چي ، د دې فلم د ښودلو مناسبت څه دی؟ دا خو د جنګسالارانو د ولجه کولو ورځ نه ده ، دا خو د افغانستان څخه د شوري ځواکونو د وتلو ورځ ده او دې ورځي ته د ملي ژغورني ورخ ويل سوېده ، په ټولو هغو کالنيو او جنتريو کي چي دولتي او غير دولتي موسسو خپرې کړيدي ، په خورا غټو ټکو ليکل سوي چي د ( دلو ٢٦ مه د ملي ژغورني ورځ رخصتي ) دا خو ممکنه نه ده چي د ملي تلويزيون چلونکي دي جنتري نه وي ليدلې او دا فلم دې خپريدلو ته وړاندي کړی وي ؟
د ناستو کسانو په منځ کي په دې تړاو يوه خورا جالبه خاطره هم را ياده سوه او دا د ١٣٧٠ يم کال د همدې ملي ژغورني د ورځي په تړاو وه . په ١٣٧٠ لمريز کال دا کتر نجيب الله د شوروي پوځيانو د وتلوورځ د يوه فرمان په ترځ کي د ملي ژغورني د ورځي په نوم رخصتي اعلان کړل . د همدې فرمان په اړه د ( سلام ) په نوم يوې خپلواکي خپروني خورا په زړه پوري ليکنه خپره کړل ، چي په ليکنه کي دا فرمان خورا ارزښتمن ګڼل سوې وو او دا هم ورسره زياته سوې وه ،چي د روسي ځواکونو د وتلو ورځ د ملي ژغورني ورځ اعلان سوه ، اوس بايد دوهم ګام هم پورته سي . هغه افغانان چي په زندانو نو کي د روسي لښکرو سره د جګړې او مخالفت په نوم ، د بند شپې ورځي تيروي د ملي ژغورونکو په نوم په وياړ له زندانو نو خوشي او د ملي قهرمانانو په څير دي د ځانګړو مراسمو په ترځ کي د زندان له تيارو را ويستل سي.
هغې ليکني ته د هغه مهال واکمنو او په ځانګړې توګه جمهور رئيس داکتر نجيب الله ګړندی پاملرنه وکړل او ښاغلي توخي ته يې هدايت ورکړ چي د سلام خپلواکي مهالنی د مسولينو سره يوه بيړنی ناسته وکړي او د دې ستونزي د حقوقي حل پر لارو چارو خبري وکړي . په همدې اړه غونډه جوړه سوه او په ترځ کي بيلا بيلي پريکړي وسوې او په دې منځ کي يوه پريکړه داوه چي : هغه شمير بنديان چي د محاکمو له لوري ورستی حکم نه لري ، د هغوی دوسيېو ته دي په يوه اونی کي د همدي فرمان متن ته په پام د برئت حکمونه تر تيب سي. هغه چي د محاکمو له لوري په نهايې حکمونو په زندان کي دي ، د هغوی دوسيې دي بيا وکتل سي او د زندانه د خلاصون لاره دي ډير ژر ورته برابره سي. خو هغه کسان چي د روسي ځواکونو سر د مخالفت په نوم تورن سوي ، او په څنګ کي يې دحق العبدي دعوی پاته وي ، هغوی د ي د حق العبدي برخي د جرم مطابق سزا و ويني.
دا هغه مهال وو چي د داکتر نجيب الله پر خلاف د هغه د يو شمير پخوانيو ملګرو ، چي افغانستان ته د روسي ځواکونو د راتللو اصلي مُهرې وي او د روسي ځواکونو د وتلو له امله يې د داکتر نجيب الله سره مخالفت درلود ، او د همدې له امله يو شمير بنديان سوي وه ، خو يو شمير نوريې لا د داکتر نجيب الله په واکمنه اداره کي په خورا ځواکمن موقعيت کي دولتي چاري پر مخ بيولې . کله چي دا فېصله په دولت او حکومت کي د روسي پلو کسانو لاس ته ورسېدل ، نو سمدستي يې د خپلو ملګرو په ګټه وکارول او هغه کسان يې را خوشي کړل چي نه يوازي د روسي ځواکونو د وتلو مخالف نه وه بلکي د روسي ځواکونو د راوستلو مهمي مًهرې هم وي.
دا خاطره کټ مټ بيا تکرار سوه ، هغه کسان چي د جهاد پر مهال يې د روسي ځواکونو سره پروتوکولونه لاسليک کړي وه ، هغوی د دې ورځي د نمانځني په بهانه د خپلو هغو جنايتونومستند فلم په ملي تلويزيون کي نندارې ته کښيښود چي نه يوازي د ملي ژغورني ورځ يې تجليل نه کړه بلکي د روسي پلو کسانو پر پل يې قدم کښيښود او د ملي مجرمينوپه څيره يې خپله کرغيړنه څيره برملا کړه .
زموږ دا تبصرې او خاطرې لا رواني وې چي فلم ، قطع او ملي ترانې پيل سوې . زموږ پام لا ورته زيات سو، موږ فکر کاوه چي ښايې په تير وتنه کي فلم ځنډيدلی وي ، خو له نيکه مرغه بيا مو ونه ليد، او قطع سو. فکر کوم چي زما په شان به زياتوليدونکو د جناتکارانو هغه فلم ليدلی وي چي پر نيم قطع سو، اوس پوښتنه دا ده چي د دې فلم د خپرېدلو وجه څه وه ؟ دې فلم چي د هغی ورځي سره هيڅ ډول تړاو نه دلود، څنګه نندارې ته کښيښودل سو ؟ او د خوښی خبره خو دا ده چي د بشپړي نندارې مخه يې ونيول سوه ، دا هم د پوښتني ده چي څنګه پر نيم پريښودل سو ؟
زه هيله من يم چي د ملي تلويزيون چلونکي دا ډول تيروتنو ته پام وکړي او پرې نښودل سي چي ملي تلويزيون د ملي يووالي په وړاندي د بې اتفاقیو عامل سي .
په درنښت
